സീക്വലുകളോട് താല്പര്യം ഇല്ല, 'ബാഷ 2', 'പേട്ട 2' നിരസിച്ചു, 'ജയിലർ 2' ചെയ്യാനുള്ള കാരണം വ്യക്തമാക്കി രജനികാന്ത്

സീക്വലുകളോട് പൊതുവെ താൽപ്പര്യമില്ലാതിരുന്നിട്ടും 'ജയിലർ 2' ചെയ്യാൻ കാരണമെന്തെന്ന് വ്യക്തമാക്കി സൂപ്പർസ്റ്റാർ രജനികാന്ത്. ഒക്ടോബർ 15ന് ചിത്രം തിയറ്ററുകളിലെത്താനിരിക്കെ, റിലീസിന് മുമ്പായി നടന്ന സൂപ്പർ ഷോയിലാണ് അദ്ദേഹം ഇക്കാര്യം തുറന്നുപറഞ്ഞത്. പേട്ട 2 , ബാഷ 2 സിനിമകളുടെ സീക്വലുകൾ ചെയ്യാൻ ഉണ്ടായിരുന്നെങ്കിലും തനിക്ക് താല്പര്യം ഇല്ലാതെ ഉപേക്ഷിക്കുകയായിരുന്നുവെന്നും രജനികാന്ത് പറഞ്ഞു.

'സീക്വലുകളോട് പൊതുവെ എനിക്ക് താൽപര്യമില്ല. ആദ്യഭാഗം എടുത്ത് അതിൽ അൽപം മസാല കൂടി ചേർത്ത് മറ്റൊരു സിനിമയാക്കുകയാണ് പലപ്പോഴും ചെയ്യുന്നത്. 'ബാഷ 2'വിന്റെ നിർദേശം എനിക്ക് ലഭിച്ചിരുന്നു. കാർത്തിക് സുബ്ബരാജ് 'പേട്ട 2'വുമായും സമീപിച്ചു. വിജയ് സേതുപതിയുടെ കഥാപാത്രത്തെ കൂടുതൽ വികസിപ്പിക്കാനായിരുന്നു പദ്ധതി. എന്നാൽ, ഈ രണ്ട് ചിത്രങ്ങളും ചെയ്യാൻ എനിക്ക് താൽപര്യമുണ്ടായിരുന്നില്ല. 'ജയിലർ' ഒ.ടി.ടി.യിൽ റിലീസ് ചെയ്തശേഷം ഞാൻ വീണ്ടും കണ്ടു. വർമ്മയുടെ കഥാപാത്രത്തെ അവസാനിപ്പിക്കാനൊരുങ്ങുന്ന സമയത്ത്, അതിലും വലിയൊരു ശൃംഖലയുണ്ടെന്നും അവർ അയാളെയും വെറുതെ വിടില്ലെന്നും പറയുന്നുണ്ട്. അതുകൊണ്ടുതന്നെ രണ്ടാം ഭാഗത്തിന് അനുയോജ്യമായ കഥയായിരുന്നു 'ജയിലറി'ന്റേത്', രജനികാന്ത് പറഞ്ഞു.

അതേസമയം, ഒക്ടോബർ 15ന് ജയിലർ 2 തിയേറ്ററുകളിലെത്തും. ഡിസ്ട്രിക്റ്റ് ആപ്പിൻ്റെ കേരളത്തിലെ പ്രീ ബുക്കിങ് ചരിത്രത്തിൽ ആദ്യമായാണ് ഒരു ചിത്രത്തിൻ്റെ 12000 ത്തിലധികം ടിക്കറ്റുകൾ ആദ്യ ഒരു മണിക്കൂറിൽ വിറ്റു പോകുന്നത്. ബുക്ക് മൈ ഷോ, ഡിസ്ട്രിക്റ്റ് ബൈ സൊമാറ്റോ, ടിക്കറ്റ് ന്യൂ എന്നീ ആപ്പുകൾ വഴിയും കൗണ്ടർ വിൽപന വഴിയും ആദ്യ മണിക്കൂറിൽ ചിത്രത്തിൻ്റെ 1 ലക്ഷത്തിലധികം ടിക്കറ്റുകളാണ് കേരളത്തിൽ വിറ്റ് പോയത്. സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിക്കുന്ന ചിത്രം കേരളത്തിൽ ശ്രീ ഗോകുലം ഗോപാലൻ്റെ ശ്രീ ഗോകുലം മൂവീസാണ് വിതരണം ചെയ്യുന്നത്.

ചിത്രത്തിലെ നായകന്‍ രജിനികാന്താണെങ്കിലും മലയാളികളും ഒരു വിഭാഗം ഓഡിയന്‍സും കാത്തിരിക്കുന്നത് മോഹന്‍ലാലിന്റെ കഥാപാത്രത്തിനായാണ്. ചിത്രത്തിന്റെ ട്രെയ്‌ലറില്‍ സെക്കന്‍ഡ് നേരത്തേക്കാണ് ലാലേട്ടൻ പ്രത്യക്ഷപ്പെടുന്നതെങ്കിലും യൂട്യൂബിലെ കമന്റ് ബോക്‌സ് മുഴുവൻ മോഹന്‍ലാല്‍ ആരാധകര്‍ കൈയടക്കിയിരുന്നു.

Content Highlights:  Rajinikanth has reportedly declined sequel projects such as 'Baashha 2' and 'Petta 2', citing his reluctance to revisit earlier films. He has also explained why he agreed to be part of 'Jailer 2', making an exception to his usual approach towards sequels.